Kompás greindi frá því í vikunni að samhliða fjölgun íbúa, ferðamanna og tilkynntum sakamálum þá hefði lögreglumönnum fækkað. Þá sérstaklega hefur verið fækkun meðal menntaðra lögreglumanna. Háskólanám lögreglufræða hefur ítrekað sætt gagnrýni síðustu ár, bæði hvað varðar skipulag náms og einnig ströng skilyrði sem einstaklingar þurfa að uppfylla til að verða metnir hæfir. Þú mátt ekki vera haldinn kvíða, ADHD, hjartagalla og svo framvegis og svo framvegis. Hlutfall ómenntaðra lögreglumanna og lögreglunema í afleysingum hefur hins vegar farið hækkandi. Góð og öflug lögregla, skipuð hæfu fólki er grundvöllur þess að almenningur megi finna fyrir öryggi. Finnst okkur við örugg eins og staðan er í dag? Við leyfum nemum að starfa við löggæslustörf, en þeir sömu nemar eru svo ekki metnir hæfir til að gegna sama starfi í formlegu starfsnámi. Svo þykjumst við vera furðulostin yfir þeirri stöðu sem upp er komin. Eru síðan engir lögreglumenn sem greinast með líkamlega eða andlega kvilla að námi loknu? Eða skiptir það kannski bara máli meðan á náminu stendur?