Það eru líklega fáir á landinu sem ekki hafa fundið fyrir neinum áhrifum af COVID-19 faraldrinum og ljóst að atvinnuhorfur margra eru mun dekkri en í ársbyrjun. Hins vegar verður hópur, sem fáir höfðu kannski hugsað til fyrr en í þessari viku, líka fyrir áhrifum. Þar er um að ræða fíkniefnasala. Nú er samkomubann og skemmtanalífið á landinu hefur smækkað niður í öreindir. Einnig fyrirbyggja höft á samgöngum milli landa væntanlega ólöglegan innflutning á slíkum efnum. Eiturefnasalar eru því að lenda í hvoru tveggja birgðaskorti og stórminnkaðri eftirspurn. Þetta er hópur sem getur að líkindum ekki nýtt sér neitt af þeim úrræðum sem ríkið hefur boðað til að styðja launþega og launagreiðendur á þessum tímum. Varla sækja eiturefnasalar um atvinnuleysisbætur? Því þurfa neytendur fíkniefna líklega að sætta sig við að verð á fíkniefnum rjúki upp úr öllu valdi. Æ æ.