Það hefur lengi verið rígur milli Morgunblaðsins og Fréttablaðsins, þá sérstaklega eftir að Fréttablaðið náði stóru forskoti fyrir rúmum áratug. Davíð Oddsson, ritstjóri Morgunblaðsins, og lærisveinar hans hafa lengi sakað Fréttablaðið um að troða sér óumbeðið inn á heimili landsmanna, það geri það verkum að lestrartölurnar séu svona háar. Davíð notaði tækifærið þegar hann var sjötugur fyrir ári síðan til að hæðast að Fréttablaðinu og sagði:

„Ég vil biðja ykkur öll að skála og núna fyrir gestgjafanum, Árvakri. Sem hefur stýrt þessu myndarlega blaði núna í 105 ár bráðum og er ekkert blað annað sem svo lengi hefur lifað. Reyndar er ekkert annað blað í landinu, satt best að segja. Ekki sem hægt er að lesa. Það er til blað sem vitað er að einhverjir fletti en ég hef ekki enn hitt neinn sem les það,“ sagði Davíð í lok ræðu sinnar í húsnæði Morgunblaðsins og lyfti glasi sínu.

Þessi ummæli vekja óneitanlega athygli í ljósi Staksteina Morgunblaðsins á föstudaginn, en Davíð er oftar en ekki talinn vera höfundur þeirra. Ekki nóg með að það sé vitnað í Fréttablaðið heldur er beinlínis gert ráð fyrir því að lesendur Morgunblaðsins lesi Fréttablaðið. Þetta teljast óneitanlega tíðindi.