Það er hugsanlega merki um að hér ríki góðæri þegar háværasta stjórnmálaumræða sumarsins snýst um komu Piu Kjærsgaard, forseta danska þingsins, á hátíðarfund Alþingis á Þingvöllum. Málið hefur valdið talsvert meira fjaðrafoki en staða heimilislausra og var um helgina að rata enn og aftur á síður danskra dagblaða. Nú síðast var það Jón Kalman Stefánsson rithöfundur sem kallaði eftir afsögn Steingríms J. Sigfússonar, forseta Alþingis. Hafa margir af hörðustu stjórnarandstæðingum fagnað grein Jóns Kalmans.

Eðli málsins samkvæmt er erfitt að fylgjast með því hvað allir segja í svona stórum málum og hefur það líklegast farið fram hjá Jóni Kalman að Steingrímur J. er þegar búinn að sverja af sér komu Piu. Sagðist hann ekki hafa átt hugmyndina af því að bjóða henni en sagði þó að hann hefði ekki verið á móti því á fundi forsætisnefndar Alþingis í fyrra. Tók hann þó fram að á þeim tíma hefði staðan í dönskum stjórnmálum verið næstum því jafn stormasöm og hér á landi og það hefði ekki einu sinni verið á hreinu hvort Pia yrði enn í embætti ári síðar.

Svo virðist sem Jón Kalman hafi ekki fengið memo-ið frá Steingrími.