Svo virðist sem ekkert sé að gerast í kjaramálum ljósmæðra. Þær sitja áfram fastar í láglaunakviksyndi á sama tíma og aðrir með jafn langa menntun moka inn peningum í góðæri, oftar en ekki á kostnað sama ríkis og talar um jafnlaunavottanir, jafnrétti og samfélagslegt mikilvægi þess að fæða börn á heilbrigðan hátt, hlúa að sjúkum og kenna fólki.
Sú hugmynd hefur vaknað að láta ljósmæður taka upp prestakerfið, fá þá sömu grunnlaun og prestar, yrðu þá úrskurðir kjararáðs beintengdir kjarasamningum ljósmæðra, svo myndu þær geta rukkað aukalega fyrir ýmsa þjónustu.
Ljósmæður hafa greint frá því að litið sé á þeirra starf sem einskonar tímabundin verkefni á vegum ríkisins, þeim er bannað að neita yfirvinnu og höfðað er til samvisku þeirra að starfa áfram. Nú sinnir ríkið mörgum tímabundnum verkefnum, eins og til dæmis að gera úttektir á hinu og þessu, lögfræðingar fá 25 þúsund krónur á tímann fyrir að vinna afmörkuð fyrir ríkið. Svipaða sögu er að segja af almannatenglum sem selja þjónustu sína dýrt þegar Fésbók heimtar höfuð ráðherra.
Fyrst að taka á móti börnum er afmarkað verkefni er þá ekki um að gera fyrir ljósmæður að taka upp lögfræðingakerfið, ríkið segir hvað það vill taka á móti mörgum heilbrigðum börnum og ef það á að gerast þarf að ráða ljósmæður af ljósmæðrastofu til að sinna þeim verkefnum á 25 þúsund á tímann.