Stjórnmálamenn, atvinnurekendur og annað hátekjufólk er þegar komið í stellingar fyrir komandi átök á vinnumarkaði. Búið er að ræsa fram Gylfa Zoega til að kæfa vonir almennings um hækkanir í ætt við þær sem þingmenn, embættismenn og forstjórar hafa fengið, margir hverjir afturvirkt. Þeir sem þekkja umræðuna vita að orðin „óðaverðbólga“ og „kaupmáttaraukning“ mun bera á góma. Einnig orðið „höfrungahlaup“. Vandinn er hins vegar sá að fyrsti, annar og þriðji höfrungurinn eru farnir af stað, hægt var að stöðva þá alla með lagabreytingu. Það verður því hægara sagt en gert fyrir atvinnurekendur og stjórnvöld að sannfæra verkafólk um að það eigi að fá nokkra þúsundkalla í hækkun þegar aðrir fengu mörg hundruð þúsund krónur.