Lögregla hafði í nógu að snúast í gærkvöldi og nótt. Skráð voru rúmlega áttatíu mál og sex voru vistaðir í fangaklefa. Níu voru stöðvaðir fyrir ölvunar og/eða fíkniefnaakstur.
Þá stöðvaði lögregla för bifhjólamanns sem ók á 146 km hraða á 60 götu. Var hann sviptur ökuréttindum sínum á staðnum og má búast við að verða umtalsvert fátækari fyrir vikið.
Fjórir voru handteknir eftir slagsmál í miðbænum og einn fékk að dúsa í fangaklefa vegna málsins. Annar gisti fangaklefa vegna ránstilraunar hans og fyrir að hafa ógnað vegfarendum í miðbænum og reynt að hafa af þeim aur.
Tveir munnu duttu á andlitið, einn í miðbænum og annar í vesturbænum. Voru báðir fluttir með sjúkrabíl á bráðamóttöku. Enn einn slaðaðist við trampólín stökk og var hann einnig fluttur með sjúkrabíl á slysadeild.
Lögregla stöðvaði jafnframt framleiðslu fíkniefna í hverfi 110 í nótt og voru tveir handteknir vegna málsins. Þeim var sleppt að lokinni skýrslutöku.
Ekkert fréttnæmt gerðist á lögreglustöð 2, sem sinnir Hafnarfirði, Garðabæ og Álftanesi og má því búast við að þar hafi allt verið með kyrrum kjörum í nótt.