61 máli er varðar ólöglega heimagistingu hefur verið lokið með stjórnvaldssektum og nema þær og fyrirhugaðar stjórnvaldssektir tæplega 100 milljónum. 59 mál hafa verið send til rannsóknar hjá lögreglunni. Þetta er afrakstur herts eftirlits með gististarfsemi en Þórdís Kolbrún Reykfjörð Gylfadóttir, ferðamálaráðherra, hratt átakinu af stað í fyrra.

Fréttablaðið skýrir frá þessu í dag. Haft er eftir Þórdísi að það sé ánægjulegt að átakið hafi skilað svona miklum árangri.

Auk fyrrnefndra mála hafa upplýsingar um 420 fasteignir verið sendar til skattrannsóknaryfirvalda. Rúmlega 3.000 ábendingar hafa borist um óleyfilega skammtímaleigu. 2017 var áætlað að allt að 80 prósent skammtímaleigu hér á landi færi fram án þess að tilskilin leyfi væru til staðar.

Í janúar hafði tíðni skráninga vegna skammtímaleigu aukist um 400 prósent frá sama tíma í fyrra. Þó er talið að um helmingur allrar skammtímaleigu fari enn fram án tilskilinna leyfa eða skráningar.

Áætlað var að kostnaður vegna herts eftirlits yrði 64 milljónir en reiknað var með að bætt skattskil og sektargreiðslur myndu vega kostnaðinn upp og nú er reynslan sú að það hefur gengið eftir og gott betur en það.