Á níunda tímanum í gær kom íbúi á 10. hæð í fjölbýlishúsi í Árbæjarhverfi heim og sá að dyrnar að íbúð hans voru opnar. Um leið kom maður út úr íbúðinni með poka í hönd. Sá náði að hlaupa á brott með verðmæti úr íbúðinni. Dyrnar höfðu verið spenntar upp.

Á fimmta tímanum í nótt braut ofurölvi maður rúðu í miðborginni og skarst á hendi. Hann var fluttur á sjúkrahús með sjúkrabifreið þar sem gert var að sárum hans. Því næst lá leið mannsins í fangageymslu en hann er erlendur ferðamaður og ekki er vitað hvar hann gistir hér á landi.

Um klukkan hálf sjö í gærkvöldi var ung kona í mjög annarlegu ástandi handtekin í hverfi 105. hún er grunuð um vörslu fíkniefna og brot á lyfjalögum. Hún var vistuð í fangageymslu. Á svipuðum tíma var maður handtekinn í hverfi 104 en hann er grunaður um vörslu/sölu fíkniefna og brot á lyfjalögum og vopnalögum. Hann var vistaður í fangageymslu.

Á ellefta tímanum í gærkvöldi var ökumaður handtekinn í miðborginni en hann er grunaður um að hafa verið undir áhrifum fíkniefna. Við handtöku framvísaði hann stórum hnífi.

Tveir ökumenn voru handteknir í nótt grunaðir um ölvun við akstur.

Í gærkvöldi var akstur ökumanns stöðvaður í Breiðholti. Sá reyndist vera sviptur ökuréttindum og eftirlýstur að auki. Hann var því handtekinn og vistaður í fangageymslu.