Von er á fjölda herskipa til landsins í dag og á morgun og koma þau frá Bretlandi, Kanada og Bandaríkjunum. Þetta kemur fram á vef Aflafrétta. Tilefnið er árlega varnaræfing Atlandshafsbandalagsins, Trident Juncture 2018, en tilgangurinn er að efla sameiginlegar varnir bandalagsríkjanna Liggja skipin við bryggju á Skarfabakka í Sundahöfn og ljóst er að mikið umstang er í kringum komu þeirra hingað til lands.
Búist er við að hátt í 40 til 50 rútur muni aka á milli hafnarinnar og Hörpu næstu daga og þá sjá 55 minni rútur um að flytja yfirmenn skipanna um Reykjavík og nágrenni. Þá munu rútur sjá um flytja hátt í fimm hundruð hermenn upp í Þjórsárdal.
Um er að ræða stærstu varnaræfingu bandalagsins frá 2015, líkt og fram kemur á vef Stjórnarráðsins. Í aðdraganda aðalæfingarinnar í Noregi fer fram minni æfing sem verður haldin þann 17. október í Sandvík, nærri Höfnum í Reykjanesbæ, og á öryggissvæðinu á Keflavíkurflugvelli. 400 manna bandarískt landgöngulið æfir lendingu í Sandvík en um 120 landgönguliðar verða fluttir með þyrlum á öryggissvæðið þar sem æfð verða viðbrögð við árás á stjórnstöð Landhelgisgæslu Íslands.
Sitt sýnist þó hverjum um þessar aðgerðir. Samtök hernaðaandstæðinga fordæma „stríðsleiki“ hér á landi í meðfylgjandi yfirlýsingu.
„Samtök hernaðarandstæðinga gagnrýna harðlega þessar heræfingar með þeirri sóun og umhverfsskaða sem þeim fylgja. SHA minna á að í grunninn er tilgangur allra heræfinga að þjálfa menn í að drepa annað fólk.
Í öðrum og óskyldum fréttum, vilja Samtök hernaðarandstæðinga tilkynna um sögu- og menningarferð sína um Þjórsárdal n.k. laugardag. Hópur friðarsinna mun þá halda að morgni dags frá Reykjavík og verja deginum við að skoða náttúru og söguminjar á þessu fallega landssvæði. Meðal annars verður ítarlega fjallað um sögu Gauks Trandilssonar á Stöng, sem felur í sér sígildan boðskap um fánýti ofbeldis. Samtök hernaðarandstæðinga láta í ljós þá ósk að Nató-hermenn muni ekki trufla þessa skemmtilegu ferð eða spilla fyrir henni á nokkurn hátt, en eru þó við öllu búin.“
Kolbeinn Óttarsson Proppé þingmaður Vinstri grænna ritar sömuleiðis pistil á facebooksíðu sína þar sem hann kallar æfingarnar „morðæfingar.“
„Heræfingar eru ekki spennandi leikur fólks með framúrstefnuleg tól. Þetta er æfing í að drepa annað fólk. Við, sem metum líf annarra, eigum að vera á móti slíku, enda á maður ekki að drepa annað fólk.“