Drónaárásir voru gerðar á Moskvu nú í morgun en alls segjast Rússar hafa stöðvað átta slík flygildi og engin þeirra hafi hæft skotmörk sín. Einn dróninn var skotinn niður skammt frá íverustað Vladimir Pútín, Rússlandsforseta. Engar fregnir eru af mannfalli í rússnesku höfuðborginni en einhverjar skemmdir urðu á byggingum þar sem að drónarnir skullu til jarðar.

Pútín brást hinn versti við árásunum og fordæmdi þær í hvívetna. Sagði hann að sambærilegar árásir Rússa á Kyiv, sem staðið hafa yfir undanfarna þrjá daga, beindust gegn hernaðarlegum skotmörkum en eini tilgangur Úkraínumanna væri sá að skjóta saklausum íbúum Rússlands skelk í bringu. Rétt er að geta þess að Úkraínumenn hafa neitað fyrir aðkomu sína að drónaárásunum í morgun en ljóst er að fræjum óttans hefur sannarlega verið sáð meðal íbúa Moskvu.

„Ég hélt einhvern veginn að allt þetta væri svo langt í burtu, að þetta myndi ekki hafa áhrif á okkur en skyndilega er þetta komið svo nærri okkur,“ hefur AFP-fréttastofan eftir rússneskum ellilífeyrisþega Tatyönu Kalinina.

Aðrir íbúar voru stóískari og sögðu að viðbúið væri að slíkar árásir yrðu gerðar á Rússland í ljósi þess að átökin virtust vera að stigmagnast.

Úkraínumenn virðast þó hinir ánægðustu með að íbúar Moskvu þurfi að upplifa slíkar hörmungar. Vitali Klitschko, borgarstjóri Kyiv, sagði að hann skyldi ekki hvernig íbúar Moskvu fengju að lifa friðsælu lífi í Moskvu á meðan rússneski herinn láti hörmungum rigna yfir höfuðborg Úkraínu. Sagði hann að íbúar Moskvu ættu að fá að upplifa við hvað íbúar Kyiv hefðu mátt ganga í gegnum undanfarna átján mánuði.