Um klukkan 22.30 í gærkvöldi barst lögreglunni í Agder lögregluumdæminu í Noregi tilkynning um að illa slasaður maður væri í Flekkefjord, töluverðan spöl frá miðbænum. Þegar lögreglumenn komu á vettvang fundu þeir annan illa slasaðan mann til viðbótar. Mennirnir voru fluttir á sjúkrahús en þeir eru báðir í lífshættu. Annar var fluttur á háskólasjúkrahúsið í Stavanger en hinn á Ullevål sjúkrahúsið.

Málið var mjög óljóst í upphafi og lítið sem ekkert vitað um hvað hefði komið fyrir mennina annað en það að ætla mátti að eitthvað glæpsamlegt hefði gerst. Lögreglan tjáði sig lítið um málið framan af nóttu.

Undir morgun sagði talsmaður lögreglunnar að annar hinna særðu hefði knúið dyra á húsi og hefði verið með greinilega áverka í andliti og stóð hnífur fastur í baki hans. Húsráðandinn hafði samstundis samband við lögregluna.

Einn hefur verið handtekinn vegna málsins að sögn Norska ríkisútvarpsins.