Björg segir nokkuð ljóst að nú taki við ný kynslóð í Ráðhúsinu og kveðst hún vona að þeim beri gæfa til að vinna vel saman fyrir borgarbúa og setja þjónustu við Reykvíkinga efst á dagskrá.
„Þetta er upp til hópa gott fólk sem ég veit að vill leggja samfélaginu gott, þó okkur greini stundum á um bestu leiðirnar til þess. Við höfum varið miklum tíma síðustu daga og mig langar að nota tækifærið og hrósa þeim,” segir Björg sem hefur svo upptalninguna.
Um Sigfús Aðalsteinsson, oddvita Okkar borgar, segir hún:
„Fær hrós fyrir að hafa menntað sig sem leikskólakennari – áttar sig augljóslega á mikilvægi þeirra starfa.“
Þetta segir hún um Guðmund Inga Þóroddsson, oddvita Flokks fólksins:
„Útsjónarsemi við að koma sér í stöðu til þess að tala máli sinna kjósenda.”
Um Einar Þorsteinsson, oddvita Framsóknar, segir hún:
„Fær prik fyrir að láta sér aldrei tækifæri úr greipum renna tækifæri til þess að segja pabbabrandara. Það skiptir máli að vera léttur.”
Þetta segir hún um Sönnu Magdalenu Mörtudóttur, oddvita Vinstrisins:
„Sanna ber nafn með rentu og er sönn manneskja. Sanna hefur sérstaklega góða nærveru.“
Hún hrósar líka Hildi Björnsdóttur, oddvita Sjálfstæðisflokksins:
„Hún fær hrós fyrir þrautseigju, að hafa verið í minnihluta í borgarstjórn í 8 ár og vera ekki búin að gefast upp.“
Pétur Marteinsson hjá Samfylkingunni fær einnig lof.
„Pétur er baráttumaður fyrir jöfnuði í samfélaginu sem ég virði. Ég sé margt fara saman í stefnu Viðreisnar og Samfylkingar.“
Um Ara Edwald, oddvita Miðflokksins, segir hún:
„Hann fær hrós fyrir að vera límheili, Ari er mjög talnaglöggur sem mun koma sér vel í Ráðhúsinu.“
Hún hrósar síðan Silju Sóleyju Birgisdóttur hjá Sósíalistaflokknum.
„Mér finnst Silja ákveðin stjarna í þessari kosningabaráttu, hún spratt einhvern veginn fram á sjónarsviðið og hefur komið mjög vel fram.“
Kristinn Jón Ólafsson, oddviti Pírata, fær einnig gott hrós.
„Kiddi fær hrós fyrir að standa með mikilvægum málum þó það sé stundum erfitt. Kiddi tekur líka rökum og það er þægilegt að ræða við hann.“
Um Ingimar Þór Friðriksson hjá Góðan daginn-framboðinu segir hún:
„Ingimar fær hrós fyrir sérstaklega góða framkomu. Ingimar er mikið ljúfmenni.“
