Umhverfis- og nýsköpunarstyrktarsjóður Terra hefur opnað fyrir umsóknir um styrki til verkefna sem stuðla að hringrásarhugsun, draga úr umhverfisáhrifum eða bæta úrgangsstjórnun. Frá þessu greinir Terra í tilkynningu en þetta er í fyrsta skipti sem fyrirtækið veitir styrki til slíkra verkefna.

Haft er eftir Ernu Björk Häsler, markaðsstjóra Terra, að leitað sé eftir frumlegum lausnum sem bæta nýtingu auðlinda, efnisstrauma eða stuðla að sjálfbærari samfélögum. Verkefnin þurfa að styðja við sjálfbærnistefnu Terra og heimsmarkmið Sameinuðu þjóðanna um sjálfbæra þróun sem félagið leggur áherslu á. Umsóknarfrestur er til 1. júní 2026.

„Við hjá Terra viljum styðja við aðila sem vinna að lausnum sem stuðla að sjálfbærni og betri framtíð fyrir okkur öll. Við leitum að frumkvöðlum, sprotafyrirtækjum og öðrum aðilum sem eru með hugmyndir eða verkefni sem styðja við umhverfismál, bæta umgengni við jörðina og skapa leiðir í átt að hringrásarhugsun. Við störfum um allt land og viljum styðja við verkefni í okkar nærumhverfi eða verkefnum sem hafa áhrif á samfélagið í heild,“ segir Erna.