Á Íslandi er allra veðra von og þó að vetur konungur hafi verið ljúfur við íbúa á suðvesturhorni landsins nú í janúar hefur hann látið meira að sér kveða í öðrum landshlutum.

Myndband sem tekið var nýlega og sýnir bíl á bólakafi í snjóskafli hefur vakið athygli út fyrir landsteinana.

Vitalijus Barauskas birti myndbandið á Facebook-síðu sinni síðastliðinn föstudag þar sem það hefur fengið mikið áhorf. Þannig hafa um 45 þúsund notendur sett svokallað „tjákn“ við myndbandið á síðu hans.

Þá birti bandaríski fréttamiðillinn ABC myndbandið á Facebook-síðu sinni í gærkvöldi og hefur það fengið hátt í 100 þúsund áhorf þar. Miðað við athugasemdir við myndbandið eru margir Bandaríkjamenn hissa á snjómagninu og furða sumir sig á því hvernig Íslendingar komast eiginlega leiðar sinnar.

„Ég myndi þurfa að flytja,“ segir einn sem kveðst búa í New Orleans. „Mér verður skítkalt í 20 stiga hita,“ bætti hann við. „Ég myndi fá mér vinnu þar sem ég get verið heimavinnandi,“ segir annar. „Ég elska snjó en þetta er aðeins of mikið,“ segir svo enn annar.