Nýverið tóku hjónin Ingveldur Ýr Jónsdóttir og Ársæll Hafsteinsson og Þórunn Helgadóttir og Samuel Lusiru Gona við rekstri ferðaskrifstofunnar Ferðasýn.

Með áralanga reynslu og innsýn inn í kenískt samfélag og góða staðkunnáttu vilja þau bjóða upp á fjölbreyttar sérsniðnar ferðir til Kenía og kynna landið fyrir sem flestum Íslendingum, eins og segir í tilkynningu.

Þórunn og Samuel Lusiru Gona, sem er frá Kenía, hafa búið og starfað þar í tæp 20 ár. Ingveldur Ýr og Ársæll hafa ferðast margoft til Kenía og kynnst landinu vel.

„Kenía er fallegt land með mikla menningu, milt loftslag og dásamlegt og gestrisið fólk. Ferðir okkar þangað eru mikil upplifun og við viljum gefa sem flestum Íslendingum kost á að heimsækja Kenía á einstakan og sérsniðinn hátt. Þar sem við höfum fundið fyrir miklum áhuga frá golfurum að spila í Kenía höfum við bætt við ferðum þar sem blandað er saman golfi við ævintýralegar aðstæður og safariferð,“ segir Ingveldur Ýr.

Þórunn og Ingveldur Ýr taka að sér að skipuleggja ferðir til Kenía fyrir hópa, og eru einnig með reglulegar ferðir af ýmsum toga. Þar má nefna ævintýraferðir þar sem tvinnast saman einstæð innsýn inn í kenískt samfélag, safarí og strönd, golfferðir, sjóstangaveiði, auk heimsókna í skóla sem þær hafa staðið fyrir rekstri á.