Kolbrún Áslaugar Baldursdóttir, þingmaður Flokks fólksins og fyrrverandi borgarfulltrúi, segir það óumdeilt að borgin þurfi að hagræða. Borgarkerfið hafi vaxið mikið og fækka þurfi stjórnendum. Hún segir í aðsendri grein í Morgunblaðinu:
„Árið 2023 lagði ég til að stafrænt ráð yrði lagt niður og ári síðar að gerð yrði óháð úttekt á þjónustu- og nýsköpunarsviði með hagræðingu í huga. Hafði lengi gagnrýnt umfang og kostnað stafrænnar vegferðar borgarinnar en ekki var tekið vel í þær hugmyndir.
Því ber að fagna vilja núverandi meirihluta til að taka til í kerfinu. En það er ekki sama hvar niðurskurðarhnífurinn ber niður.“
Hún segir að tryggja verði þjónustu og hagfræðing sé ekki það sama og þjónustuskerðing. Þjónustuskerðing í viðkvæmum málaflokkum geti valdið auknum kostnaði í framtíðinni. Uppsagnir skólaliða eru á meðal þess sem gefi hagræðingunni yfirbragð skerðingar:
„Áttatíu og níu starfsmönnum á velferðarsviði og skóla- og frístundasviði hefur nú verið sagt upp. Þrjátíu og tveimur verða boðin önnur eða breytt störf en 54 missa vinnuna varanlega. Breytingarnar eiga að skila um 900 milljóna króna hagræðingu á ári og borgarstjóri segir þetta aðeins byrjunina.
Framlínuþjónustan verði engu að síður varin. Ég vona svo sannarlega að það gangi eftir.
Þegar svo umfangsmiklar breytingar eru gerðar á sviðum sem sinna börnum, fjölskyldum og fólki sem þarf félagslegan stuðning hlýtur maður að spyrja hvernig tryggt verði að þjónustan skerðist ekki.
Það sama á við þegar störf skólaliða hverfa eða gjaldskrár fyrir þjónustu við eldra fólk hækka. Þarna fer hagræðingin að fá annað yfirbragð.“
Hefur mætur á Hildi borgarstjóra
Kolbrún segist hafa ágætar mætur á Hildi Björnsdóttur borgarstjóra en hún bendir á að Sjálfstæðisflokkurinn sé ekki þekktur fyrir að að setja þarfir þeirra sem minnst mega sín í forgang. Núna reyni hins vegar á forgangsröðunina:
„Hagræðing á fyrst að beinast að kerfinu, yfirbyggingunni og því sem borgarbúar geta verið án. Hún á ekki að byrja hjá fólkinu sem þarf mest á þjónustunni að halda.“
