Lögreglan á Suðurlandi hefur hætt rannsókn á andláti konu á tíræðisaldri á hjúkrunarheimilinu Hraunbúðum í Vestmannaeyjum.
Frá þessu er greint í Morgunblaðinu í dag.
Tvær konur, sem störfuðu á hjúkrunarheimilinu, voru grunaðar um að hafa átt þátt í andlátinu og voru handteknar í febrúar en gæsluvarðhaldskröfu yfir þeim var þó hafnað.
Í frétt Morgunblaðsins kemur fram að konurnar hafi fengið bréf þess efnis að rannsókn hafi verið hætt og þær hafi ekki lengur réttarstöðu sakbornings. Þetta gerðist í kjölfar þess að niðurstöður krufningarskýrslu bárust í lok síðustu viku.
Rúnar Steingrímsson lögreglufulltrúi vildi aðspurður ekki segja til um það á hvaða hátt konurnar voru grunaðar um að tengjast andlátinu.
