Sumarið 2023 sat grunnskólakennarinn Ástríður Kristín Bjarnadóttir (Ásta Bjarnadóttir) 12 vikur í gæsluvarðhaldi vegna gruns um fjársvik gagnvart 11 karlmönnum, að fjárhæð um 25 milljónir króna. Talið er að fjársvik hennar séu mun umfangsmeiri en rannsókn lögreglu leiddi í ljós að á tímabilinu 2016 til 2023 lögðu hátt í 400 karlmenn samtals um 200 milljónir króna inn á reikninga hennar. Talið er að hún hafi tapað öllum peningunum við fjárhættuspil, en Ásta þjáist, eða þjáðist, af spilafíkn.
Ásta kynntist mörgum brotaþolum á stefnumótavefnum Einkamál og fékk þá til að lána sér peninga sem hún greiddi aldrei til baka. Í verstu tilfellunum komst hún yfir rafræn skilríki brotaþola, stofnaði til yfirdráttarskulda í þeirra nafni og millifærði háar upphæðir á eigin reikninga. Í tilfellum nokkurra brotaþola námu meint fjársvik á aðra milljón króna hjá hverjum og einum, en varðandi upphæðir skal bent á að þessi alvarlegri brot ná a.m.k. aftur til ársins 2021.
DV ræddi ennfremur árið 2023 við mann sem sagði Ástríði hafa svikið út úr sér þrjár milljónir króna, sjá hér.
Ævintýralegur dráttur á málsmeðferð
Rannsókn lauk á þeim hluta meintra brota Ástu sem varða fjársvik gagnvart 11 mönnum fyrir um 25 milljónir króna haustið 2023 og var þá málið sent til ákærusviðs Lögreglunnar á höfuðborgarsvæðinu. Fleiri meint brot hennar voru þá áfram til rannsóknar. En engin ákæra hefur verið gefin út ennþá, þremur árum eftir að Ásta sat í gæsluvarðhaldi.
Þann 10. september árið 2024 staðfesti Hildur Sunna Pálmadóttir, þáverandi aðstoðarsaksóknari hjá Lögreglustjóranum á höfuðborgarsvæðinu, í svari við fyrirspurn DV, að ákæra gegn Ástu væri í smíðum.
DV hefur traustar heimildir fyrir því að í október árið 2025 sagði lögregla ákæru gegn Ástu vera svo að segja klára.
DV sendi Hildi aðra fyrirspurn um málið í þessari viku, en Hildur gegnir núna embætti aðstoðarlögreglustjóra. Í fyrirspurninni spurði DV hvort málið hafi verið fellt niður eða hvort ákæra hafi verið gefin út. Svar Hildar var eftirfarandi:
„Unnið er að því að klára málið og von á að því ljúki í sumar.“
DV spurði þá hvort fyrirséð væri hvort málinu ljúki með ákæru eða niðurfellingu. Þeirri fyrirspurn var ekki svarað fyrir birtingu þessarar fréttar.
