Stefán Einar Stefánsson, blaðamaður hjá Morgunblaðinu og stjórnandi Spursmála, segir að Þorgerður Katrín Gunnarsdóttir utanríkisráðherra fullyrt við hann að hún muni koma í Spursmál áður en þjóðaratkvæðagreiðslan fer fram um aðildarviðræður Íslands um Evrópusambandið fer fram.
„Ég var staddur í góðu afmæli, fimmtugsafmæli á föstudagskvöldið, þar sem ég var að stýra góðri veislu og þar var umræddur ráðherra á staðnum. Hún kom til mín og við skáluðum létt og spjölluðum. Í vitna viðurvist þá fullyrti hún að hún myndi nú koma fyrir 29. ágúst í þáttinn. Þannig að við eigum von á góðu, ef hún stendur við það,“ sagði Stefán Einar í þættinum Bakslagið á Brotkasti.
„Ég held að hún hafi verið þokkalega edrú. Ef að fólk er eitthvað stressað fyrir því að koma í þáttinn til mín þá getur það skvett í sig einum eða tveimur áður til að róa taugarnar.“
Í síðasta þætti Spursmála gagnrýndi hann Þorgerði Katrínu fyrir að mæta ekki í þáttinn til sín.
„Ástæðan fyrir því að þær vilja ekki koma er að þær fá annars konar spurningar og aðhald í spurningum heldur en á Sprengisandi, í Bítinu eða í Kastljósi,“ segir hann.
„Hún hefur velt upp hvort það sé mikið unnið með því að mæta í viðtal til manns sem að hefur jafn sterkar skoðanir og ég hef. Þar er svarið augljóst, það er kannski ekki mikið unnið fyrir hana en það er mikið unnið fyrir kjósendur sem hefur treyst henni fyrir þessu mikilvæga ráðuneyti.“
Þá sé ekkert til í því að hann sé ófaglegur. „Staðreyndin er sú að Ríkisútvarpið og starfsmenn þess eru ekki endanlegi mælikvarði á fagleg vinnubrögð. Þess höfum við kynnst æ ofan í æ og ég held að fleiri séu að opna augun fyrir.“
Aldrei spurt hver sé réttur Íslendinga
Stefán Einar fór yfir víðan völl í viðtalinu, þar á meðal um að Evrópa í núverandi mynd væri ekki til nema fyrir krossferðirnar. Þá ræddi hann um útlendingamál og setti stórt spurningamerki við að fólk frá Albaníu sé hleypt inn í landið.
„Albaninn sem situr hér í gæsluvarðhaldi út af þessu kókaínsmygli, hann fékk í raun og ríkisborgararétt á grunni þess að hann leitaði hér skjóls af ótta við glæpaklíkur. Svo kemur bara í ljós að hann er glæpaklíkan sjálfur,“ sagði Stefán Einar.
„Aldrei er sagt í slíkri umræðu niðri á Alþingi spyrja menn þeirrar einföldu spurningar; hver er réttur Íslendinga? Hver er réttur minn og annarra almennra borgara, sem göngum hér óvopnuð niður göturnar sem betur fer, eigum við ekki tilkall til þess að stjórnvöld í landinu reyni með öllum ráðum að hingað komi ekki ótýndir glæpamenn,“ sagði hann. „Ég skil ekki hvers vegna við erum að hleypa hér inn fólki frá Albaníu.“
Fyrri kynslóðir hlegðu sig máttlausar yfir vælinu í dag
Þá ræddi hann einnig um breytingar sem hafa orðið á lífsskilyrðum á Íslandi.
„Ég held að við fáum mýkri kynslóðir eftir því sem lífsbaráttan verður léttari. Það hefur orðið gjörbreyting á þeim efnum miðað við foreldra okkar og foreldra þeirra. Afar mínir og ömmur eru fædd á tímabilinu 1922 og 1924,“ sagði Stefán Einar. „Þetta var fólk sem var fætt inn í bláfátækt land og þurfti að hafa gríðarlega mikið fyrir hlutunum. Það fólk hefði, held ég, hlegið sig máttlaust hlustandi á vælið í fólki í dag hvað það sé erfitt að koma sér upp húsnæði á Íslandi í dag.“
Hægrimenn verði fyrir meiri hatursorðræðu en samkynhneigðir
Þá ræddi hann um hinseginmálin sem hafa verið í brennidepli upp á síðkastið.
„Ég held til dæmis að hægrimenn verði fyrir mun meiri hatursorðræðu og opinberu neikvæðu áreiti en samkynhneigðir,“ sagði hann.
„Það hafa komið upp dæmi, því miður, þar sem verið er að gera hróp og köll að samkynhneigðu fólki. Menn sem leiðast niðri í bæ og það er verið að gelta á eftir þeim. Það er til óþurftar og til skammar af þeim sem halda því fram, það hefur verið notað sem dæmi um meint bakslag í réttindabaráttunni. Ég held að við munum aldrei búa til samfélag sem að fólk vegna skoðana sinna, litarhaftar eða kynhneigðar muni aldrei verða fyrir neikvæðu áreiti. Alveg eins og fólk verður fyrir áreiti ef það tjáir trúarlegar skoðanir sínar eða stjórnmálaskoðanir. Ég þekki það af eigin raun að fólk verður fyrir aðkasti vegna slíks.“
