Birgir Örn Steinarsson, yfirsálfræðingur barna-og unglingaþjónustu Sálfræðiþjónustu Norðurlands veltir upp spurningunni um hvort það sé æskilegt og flott að fá peninga greidda fyrir spons eða auglýsingar á samfélagsmiðlum.
„Er alltaf kúl að fá aur fyrir spons? Nei og ef þú ert vinsæll poppari eða rappari og ert að taka aur frá veðmálafyrirtækjum þá máttu bara pent hoppa upp í rassgatið á þér. Leyfið mér að útskýra,“
segir Birgir Örn í myndbandi á samfélagsmiðlum. Hann er þekktur sem Biggi í Maus, rokkhljómsveit sem vann Músíktilraunir árið 1994 og hefur starfað síðan.
„Þegar ég var ungur þá varð fólk frægt fyrir að gera eitthvað. Fljótlega upp úr aldamótunum þear raunveruleikasjónvarp varð veruleiki þá allt í einu gat fólk orðið frægt fyrir að vera eitthvað. Paris Hilton er skýrasta dæmið um þetta. Svo komu samfélagsmiðlarnir með það falsloforð að ef þú yrðir nægilega frægur þá fengirðu aðgang að einhverju svona glamúr líferni.“
@biggi.maus3 Þarf alltaf að Blóðmjólka? #storytime #tónlist #íslandtiktok ♬ original sound - Biggi Maus
Segir Birgir Örn það hafa í för með sér að í dag eru milljónir ungmenna með þann eina draum að verða fræg, sama fyrir hvað. „Svo þau geti fengið aðgang að fullt af fríu shitti.“
„Með öðrum orðum. Það er fullt af ungu fólki í dag að eltast við það að vera lifandi auglýsingaskilti. Mannorð þitt til sölu fyrir hvern sem er tilbúinn í að setja lógóið á ennið á þér. Þó að mér finnist það kannski ekki heillandi þá er ég alveg nægilega liberal til að segja: ef það er þessi átt sem metnaður þinn leiðir þig þá bara go for it. Njóttu vel! En hvað ef að lógóið sem er búið að pressa á ennið á þér er til þess fallið að auka sjálfsvígshættu hjá þeim sem eru að fylgja þér? Hvað ef það sem þú selur sem glamúrlíferni verður til þess að setja fólk í það mikla skuldasúpu að þeim endist ekki einu sinni ævin til að koma sér upp úr því? Hvað ef fylgjendur þínir gera hvað sem er til þess að verða eins og þú en sykurstráð eitrið sem þú ert að mata þeim með er akkúrat það sem heldur þeim frá því? Að það sem þú græðir á er þeim skaðlegt? Hvað segir það um þig?“
Skrifaði meistararitgerð um spilafíkn - Sannað að spilafíkn mótast mest á aldrinum 12-20 ára
Bendir Birgir Örn þeim sem ekki vita á það að hann starfar sem sálfræðingur. Meistararitgerð hans fjallaði um spilafíkn og segir hann það vísindalega staðreynd að spilafíkn mótast mest á aldrinum 12-20 ára.
„Hey þetta er akkúrat aldurinn sem er að hlusta á popptónlist og er að fylgja þeim sem eru að flexa á TikTok. Þetta er akkúrat aldurinn sem er með óþroskaðan framheila og hafa minni sjálfsstjórn af náttúrunnar hendi. Þetta er mjög falinn vandi. Krakkar skammast sín fyrir þetta. Þegar þú vinnur lætur þú alla vita af því. En það talar enginn um þessi mörg tug þúsunda króna, mörg hundruð þúsunda króna, sem þú ert búinn að tapa á þessu. Veðmálafyrirtæki byggja á forsendum sem þau geta geta ekki annað en grætt á. Þú ert forritaður til þess að tapa.
Þið sem eruð að taka peninga frá veðmálafyrirtækjum þið hafið enga afsökun. Samfélagsmiðlar veita ykkur innsýn inn í hvaða aldurshópar eru að skoða síðuna ykkar. Það gerir Spotify for Artists líka ef þú ert rappari eða popptónlistarmaður. Ef að það passar að þinn hópur er mest 12- 20 ára, eða upp í 25 ára, og þú ert að þessu þá ert þú vandamálið! Ekki vera blóðsuga! Hvernig væri bara að þykja vænt um fylgjendur sína og aðdáendur?“
