Jónas Már Torfason, oddviti Samfylkingarinnar í Kópavogi, segir mikilvægt að stjórnmálamenn og stjórnendur noti gervigreind af ábyrgð en útvisti ekki ákvarðanatöku til tækninnar. Þetta kom fram í samtali hans við Stefán Atla í Gervigreindarklúbbnum.
Jónas Már Torfason, oddviti Samfylkingarinnar í Kópavogi, ræddi notkun gervigreindar í sveitarfélögum, stjórnsýslu og lýðræði í nýjasta þætti Gervigreindarklúbbsins.
Í þættinum segist Jónas sjá skýr tækifæri í notkun gervigreindar, sérstaklega við gagnaúrvinnslu, áætlanagerð, fundargerðir, frávikagreiningu og undirbúning ákvarðana. Hann nefnir meðal annars að slík tækni gæti nýst sveitarfélögum við að greina biðlista, þjónustuþörf, rekstur og misræmi í gögnum.
Jónas varar þó við því að gervigreind verði notuð sem staðgengill mannlegrar ábyrgðar.
„Það er ekki hægt að útvista þeirri ákvarðanatöku til gervigreindarinnar,“ segir Jónas í þættinum. Hann bætir við að kjörnir fulltrúar verði alltaf að geta staðið við ákvarðanir sínar, jafnvel þótt gervigreind geti undirbúið þær.
Hann segir lýðræðiskerfið byggja á því að fólk kjósi fulltrúa til að fara með vald og bera ábyrgð. Því sé ekki boðlegt að stjórnmálamenn komi fram og segi að gervigreind hafi lagt til niðurskurð, breytingar eða aðrar pólitískar ákvarðanir.
„Mér finnst ekki boðlegt af kjörnum fulltrúum að koma bara og segja: gervigreind er búin að segja að við getum skorið niður þessi og þessi störf,“ segir Jónas.
Vill nýta AI til að veita betra aðhald
Í samtalinu nefnir Jónas að gervigreind gæti nýst kjörnum fulltrúum vel við að fylgja málum eftir, bera saman gögn og finna misræmi í upplýsingum sem lagðar eru fram á mismunandi tímum.
Hann segir að slíkt gæti styrkt aðhaldshlutverk kjörinna fulltrúa, sérstaklega þegar þeir þurfa að spyrja erfiðra spurninga og tryggja að allar forsendur séu uppi á borðinu.
„Maður þarf svolítið að finna þetta misræmi ef maður ætlar að vera að spyrja erfiðra spurninga og veita gott aðhald,“ segir Jónas.
Tortrygginn en sér tækifærin
Jónas segist vera bæði spenntur og tortrygginn gagnvart gervigreind, en viðurkennir að tortryggnin vegi þyngra. Hann nefnir meðal annars áhyggjur af samfélagslegum áhrifum, umhverfisáhrifum, fjárfestingarbólu og því að fólk útvisti of stórum hluta hugsunar, sköpunar og daglegra ákvarðana til tækninnar.
Hann segist þó sjálfur nota gervigreind, meðal annars Claude, til að prófa hugmyndir, greina gögn og „pressure-testa“ texta eða röksemdir.
Gervigreind í sveitarfélögum
Í þættinum ræða Stefán Atli og Jónas einnig hvernig gervigreind gæti nýst sveitarfélögum eins og Kópavogi. Jónas telur tæknina geta einfaldað vinnu við gagnagreiningu, spár, áætlanagerð og úrvinnslu stórra gagnasafna.
Hann er hins vegar varfærinn gagnvart því að setja gervigreind beint í þjónustu við íbúa ef það dregur úr mannlegum tengslum.
„Ég vil frekar hafa mannlegu tenginguna,“ segir Jónas og tekur fram að fólk eigi að geta hringt og fengið aðstoð frá manneskju þegar það leitar til sveitarfélagsins.
Kópavogur, barnafjölskyldur og framtíð bæjarins
Auk umræðunnar um gervigreind fara þeir yfir stöðu Kópavogs, leikskólamál, Kópavogsmódelið, fasteignagjöld, barnafjölskyldur og öldrunarþjónustu. Jónas segir mikilvægt að Kópavogur haldi í barnafjölskyldur og undirbúi sig fyrir aukna þjónustuþörf eldri íbúa á næstu árum.
Þátturinn er aðgengilegur á öllum helstu hlaðvarpsveitum.
Gervigreindarklúbburinn hefur nú þegar gefið út 40 þætti og fengið til sín fjölbreytta gesti úr atvinnulífi, stjórnmálum, lögfræði, listum, tæknigeiranum og nýsköpun. Meðal gesta sem hafa komið í þáttinn eru til dæmis Arnar Þór Jónsson, Stefán Þór Þorgeirsson, Einar Þorsteinsson, Ingibjörg Isaksen, Ingi Bauer, Jónas Sig, Maggi Mix og fleiri áhugaverðir einstaklingar sem hafa rætt áhrif gervigreindar frá ólíkum sjónarhornum.
