Reykjavíkurborg hefur kært þá ákvörðun Umhverfis- og orkustofnunar að borgin skuli loka gömlu ruslahaugunum í Gufunesi og vakta þá. Telur stofnunin mikilvægt að haugarnir verði vaktaðir í ljósi þess að þar hafi verið um árabil verið urðuð óflokkuð spilliefni. Segir stofnunin að fylgjast verði með mögulegum áhrifum efnanna á grunn- og yfirborðsvatn á svæðinu. Reykjavíkurborg neitaði að greiða reikning frá stofnuninni vegna fyrirmælanna.
Í bréfi Umhverfis- og orkustofnunar til borgarinnar kom fram að Gufuneshaugar væru stærsti urðunarstaður spilliefna á landinu, en hann hafi verið starfræktur á árunum 1967–2001. Þar hafi verið urðaður óflokkaður úrgangur úr Reykjavík og nágrannasveitarfélögum auk þess sem fram til ársins 1991 hafi einnig verið urðuð þar óflokkuð spilliefni af öllu landinu. Taldi stofnunin brýnt að urðunarstaðurinn yrði vaktaður og að þar færi fram að lágmarki reglubundin vöktun á grunn- og yfirborðsvatni.
Taldi stofnunin það á ábyrgð borgarinnar að ganga frá lokun hauganna og sjá til þess að þeir yrðu vaktaðir.
Borgin andmælti fyrirmælum stofnunarinnar og taldi hana skorta lagaheimild fyrir þeim.
Taldi borgin þó mikilvægt að hefja reglubundna vöktun á urðunarstaðnum og vísaði til þess að mælingar á kræklingi í vík, vestan við staðinn, myndu hefjast um vorið og að sjálfsagt væri að vinna að frekari vöktun í samráði við stofnunina. Vöktunin yrði þó ekki á grundvelli fyrirmæla Umhverfis- og orkustofnunar.
Vildu ekki borga
Umhverfis- og orkustofnun sendi Reykjavíukurborg reikning vegna gerðar lokunarfyrirmæla sem borgin neitaði að greiða með vísan til þess að ekki lægi fyrir formleg ákvörðun stofnunarinnar um að gefa borginni fyrirmæli um lokun. Ákvörðun um útgáfu fyrirmæla um lokun og vöktun lá fyrir um viku síðar. Það er sú ákvörðun sem borgin hefur kært til úrskurðarnefndar umhverfis- og auðlindamála.
Meðal þess sem þar kom fram var að sýnatökubrunnar skuli vera tilbúnir fyrir 1. júlí í ár og að skila skuli niðurstöðum vöktunar fyrir 1. maí 2027. Einnig voru þar fyrirmæli um tilteknar mælingar sem skuli gera fyrir 1. október 2026. Þann 27. maí síðastliðinn óskaði Reykjavíkurborg eftir því að gefinn yrði út kreditreikningur og að innheimtu yrði frestað þar til úrskurður úrskurðarnefndarinnar lægi fyrir. Engin svör bárust við því erindi og gaf Umhverfis- og orkustofnun út nýjan reikning 5. júní að fjárhæð 1.165.024 krónur.
Borgin fór fram á í ljósi fyrirmælanna og reikningsins að réttaráhrifum ákvörðunarinnar yrði frestað þar til nefndin hefur úrskurðað um kæruna.
Nefndin segir í sinni niðurstöðu um þá kröfu að með frestun réttaráhrifa verði einungis í reynd frestað fyrirmælum um vöktun á meðan beðið sé niðurstöðu nefndarinnar um kæruna. Verði ekki séð að það muni raska verulega þeim hagsmunum sem ákvörðunin lúti að eða að fyrir liggi knýjandi ástæður sem geri það að verkum að varhugavert sé að bíða niðurstöðunnar. Verði jafnframt að líta til þess að Umhverfis- og orkustofnun hafi ekki kosið að tjá sig framkomna kröfu um frestun réttaráhrifa.
Nefndin varð því við kröfu Reykjavíkurborgarinnar um að réttaráhrifum fyrirmæla Umhverfis- og orkustofnunar verði frestað þar til niðurstaða um kæruna liggur fyrir.
