Gunnar Axel Axelsson, fyrrverandi sveitarstjóri Voga, segir að nýr meirihluti í borgarstjórn ætli sér að setja fjármagn í pólitíska markaðssetningu á kostnað faglegrar upplýsingagjafar. Faglega ráðnu starfsfólki sé sagt upp en í staðin keypt þjónusta frá auglýsinga og markaðsfyrirtækjum.
„Jæja, nú er líklega búið að staðfesta hvað liggur raunverulega að baki þessum ákvörðunum nýs meirihluta í Reykjavík,“ segir Gunnar í færslu á samfélagsmiðlum.
Segja upp faglega ráðnu fólki
Vísar hann í frétt RÚV um að unnið hafi verið að nýju fyrirkomulagi upplýsingamála hjá borginni eftir uppsagnir faglegra ráðinna upplýsingafulltrúa. Er því velt upp hvort að verkefnunum verði útvistað.
„Í stað þess að leggja áherslu á faglega upplýsingamiðlun þá á greinilega að setja fjármagnið í pólitíska markaðssetningu og fela pólitískt ráðnum borgarstjóra að stjórna því hvaða upplýsingum er miðlað og hvernig,“ segir Gunnar. „Segja á upp öllu faglega ráðnu fólki og leggja áherslu á kaup á þjónustu frá fyrirtækjum sem sérhæfa sig i auglýsinga- og markaðsmálum.“
Áreiðanlegar og hlutlægar upplýsingar
Í fréttinni er sagt að borgarstjóri hafi notið liðsinnis ráðgjafarstofunnar Athygli við skrif tilkynninga, en það hafi verið vinagreiði og ekki greitt fyrir.
„Í því samhengi er mikilvægt að hafa í huga að í lýðræðissamfélagi gegnir fagleg upplýsingamiðlun hins opinbera gríðarlega mikilvægu hlutverki. Hún á að tryggja að almenningur, fjölmiðlar og aðrir hagsmunaaðilar fái áreiðanlegar, hlutlægar og tímanlegar upplýsingar um starfsemi hins opinbera. Upplýsingafulltrúar eiga því að starfa á faglegum forsendum, óháð pólitískum sjónarmiðum og vera einskonar brú milli stjórnsýslunnar og samfélagsins,“ segir Gunnar gagnrýninn á nýja stefnu borgarinnar.
Reykjavík hafi verið góð fyrirmynd hingað til
Bendir hann á að Reykjavík hafi hingað til verið góð fyrirmynd í upplýsingagjöf. Rík áhersla hafi verið lögð á að upplýsingamálin séu fagleg og að pólitíkin sé ekki með puttana í þeim.
„Sem hefur örugglega reynst pólitíkinni stundum erfitt, hvar fjölmiðlar hafa haft gott aðgengi að upplýsingum sem oft á tíðum hefur ekki endilega verið að hjálpa ríkjandi valdhöfum,“ segir Gunnar. „Þegar fagleg upplýsingamiðlun víkur fyrir markaðs- og kynningarstarfi, þá getur það því vissulega verið jákvætt fyrir pólitíkina en það grefur óhjákvæmilega undan trausti á stjórnsýslunni og lýðræðinu almennt. Enda er það ekki hlutverk stjórnvalda að segja bara frá því sem vel gengur og því sem hentar ríkjandi valdhöfum, heldur eiga þau að tryggja að samfélagið hafi aðgang að réttum og áreiðanlegum upplýsingum sem gefa almenningi kleift að mynda sér sjálfstæðar skoðanir.“
