Skemmdarverk voru unnin á kosningaskrifstofu Miðflokksins í Vestmannaeyjum. Skemmdarvargurinn eða -vargarnir krotuðu vísanir til Sjálfstæðisflokksins, xD, á stéttina fyrir framan skrifstofuna, á hurð, á veggi og á glugga. Eins var búið að teikna stæðilegan getnaðarlim á einn vegginn.
Miðflokkurinn deildi myndum af aðkomunni á Facebook:
„Það er mjög gaman í kosningabaráttu og við höfum gaman af skotum og kýting en ekki skemmdarverkum“
Sjálfstæðismenn í Vestmannaeyjum hafa fordæmt skemmdarverkin.
Hildur Sólveig Sigurðardóttir, bæjarfulltrúi Sjálfstæðisflokksins í Vestmannaeyjum, segir að um ólíðandi og ömurlega framkomu sé að ræða og verst sé að skemmdarverkin séu unnin í nafni Sjálfstæðisflokksins.
Hildur skrifar í athugasemd:
„Þetta er auðvitað algjörlega ömurleg og ólíðandi framkoma. Mikið er leitt að sjá þessi skemmdarverk og enn verra þykir mér að spellvirkinn/spellvirkjarnir skuli merkja skemmdarverkin með merkjum Sjálfstæðisflokksins.“
Undir þetta tekur flokksbróðir Hildar, Trausti Hjaltason, sem er í öðru sæti á lista Sjálfstæðismanna í Vestmannaeyjum fyrir kosningarnar á laugardaginn:
„Þetta eru skemmdarverk sem augljóslega eru ekki neinum sæmandi. Eitthvað sem við sem samfélag viljum ekki sjá.“
Kjartan Vídó Ólafsson, sem situr í 6. sæti á lista Sjálfstæðismanna, segir:
„Svona vill enginn sjá“
