Lögreglustjórinn á Suðurnesjum hefur ákært mann á fimmtugsaldri fyrir fjárdrátt gagnvart fyrrverandi eiginkonu sinni og tengdaföður sínum.

Maðurinn er annars vegar ákærður fyrir að hafa stofnað bankareikning í nafni fyrrverandi eiginkonu sinnar en hann hafði komist yfir rafræn skilríki hennar án vitundar hennar og vilja. Stofnaði hann til yfirdráttar á þessum reikningi og millfifærði á sjálfan sig rúmlega 1,1 milljón króna.

Hann er síðan ákærður fyrir að hafa haft fé út úr fyrrverandi tengdaföður sínum með því að taka út 377.000 krónur úr hraðbönkum eftir að hann hafði komist yfir greiðslukort tengdaföðurins og öryggisnúmer. Er hann sagður hafa notfært sér veikindi tengdaföðurins og yfirburðastöðu sína gagnvart honum.

Málið verður tekið fyrir í Héraðsdómi Reykjaness þann 13. maí en ákæran gegn manninum er birt í Lögbirtingablaðinu þar sem ekki hefur tekist að birta honum ákæruna.