Stefán Jón Hafstein, stjórnarformaður RÚV, er þeirrar skoðunar að ekki eigi að hnika til föstum aðalfréttatíma sjónvarps klukkan 19 á RÚV1 á meðan RÚV2 er ónotuð.

Stefán Jón vakti máls á þessu á stjórnarfundi RÚV fyrir skemmstu, en fjallað er um málið á síðum Morgunblaðsins í dag.

Í fundargerð stjórnar kemur fram að á fundinum hafi verið rætt um samspil á milli RÚV 1 og RÚV 2 þegar kemur að íþróttum og fréttum. Óskaði Stefán Jón eftir skýrari línum um verkaskiptingu sjónvarpsrásanna.

„Nefndi til dæmis að í útvarpi væri Rás 2, „íþróttarásin” að öllu jöfnu og gæti sama átt við sjónvarp. Stefna ætti að því að hnika ekki föstum aðalfréttatíma sjónvarps sem nú sé kl. 19:00 á RÚV 1 að óþörfu meðan RÚV 2 væri ónotuð. Að hans mati væri fréttatíminn gengisfelldur með því að færa hann á breytilega jaðartíma í dagskrá og gæta yrði að því að hlutverk og ábyrgðarskylda RÚV gagnvart fréttaflutningi væri víðtæk og mikil, ekki síst þegar framboð af kvöldsjónvarpsfréttum almennt væri minna nú en áður,“ segir í fundargerð stjórnar.

Eva Georgs Ásudóttir, dagskrárstjóri sjónvarps, sagði á fundinum að það væri dagskrárákvörðun að setja ekki vinsælustu dagskrárliði í línulegu sjónvarpi til höfuðs hvor öðrum.

„Víða á Norðurlöndum og Bretlandi séu fréttatímar færðir vegna íþróttaútsendinga og annarra stórviðburða. Tilfærsla frétta sé ekki bundin við öflun auglýsingatekna hjá þeim aðilum. Vinsælir línulegir dagskrárliðir á borð við íþróttir geri það að verkum að kvöldfréttir ná til fleiri áhorfenda sem annars myndu ekki horfa á þær,“ segir í fundargerð stjórnar.

Stefán Jón mun hafa boðað frekari umræður um skýrari og fastmótaðri verkaskiptingu rásanna þegar væntanleg dagskrárstefna sjónvarps verður kynnt.