Meðal fyrirlesara eru netöryggissérfræðingar sem stýra vörnum hjá stórum stofnunum í Evrópu. Má þar nefna þær Petru Klein og Helénu Malm frá Swedband. Þær starfa í miðju hringiðunnar hjá einum stærsta banka Norðurlandanna og búa yfir dýrmætri innsýn í hvernig á að byggja upp öryggismenningu sem virkar í raunveruleikanum en ekki bara á pappír.
Þá verður Paula Januszkiewicz einnig með fyrirlestur en hún er einn virtasti sérfræðingur heims þegar kemur að öryggi innviða og hefur eytt áratugum í að hjálpa fyrirtækjum að loka glufum sem aðrir sjá ekki.
Ásamt þeim mæta David Jacoby, sem er margverðlaunaður fyrir störf sín í netöryggi, og Geert Baudewijns, sem er leiðandi í baráttunni gegn lausnargjaldsárásum í Evrópu.
Þá verður Ragnar Sigurðsson, netöryggissérfræðingur frá Syndis, einnig með erindi en hann mun fjalla um hvernig sterk viðbragðsmenning getur hjálpað fyrirtækjum og stofnunum að bregðast hraðar og betur við árásum þegar á reynir.
„Við erum afar stolt af því að bjóða upp á þessa öflugu sérfræðinga á öryggisráðstefnu okkar. Þetta er fólk sem talar á stærstu ráðstefnum heims og það er gríðarlegt tækifæri fyrir íslenska stjórnendur og sérfræðinga að fá þessa þekkingu beint í æð hér heima. Stafrænar ógnir þekkja engin landamæri og árásir á íslensk fyrirtæki eru orðnar hluti af daglegum veruleika. Á sama tíma og tæknin þróast á ógnarhraða, eykst þörfin á að við deilum reynslu og lærum af þeim bestu í heiminum. Það er einmitt kveikjan að ráðstefnunni,“ segir Óskar Ingi, markaðsstjóri Syndis.
