Guðjón Friðriksson, sagnfræðingur, segir það ofbeldi og aldursfordóma að eldri borgarar þurfi að endurnýja ökuskírteini á tveggja ára fresti eftir 72 ára aldur. Segist hann ekki vita til þess að eldri borgarar valdi nokkrum skaða í umferðinni.
„Að eldri borgarar þurfi eftir 72 ára aldur að endurnýja ökuskírteini á tveggja ára fresti og eins árs fresti eftir áttrætt er að mínum dómi ofbeldi gegn þeim, hlaðið aldursfordómum,“ segir hinn 81 árs Guðjón í færslu á samfélagsmiðlum í dag.
Sama sjónarmið hafi hann heyrt frá læknum og að lögin hér séu langtum strangari en í öðrum Evrópulöndum.
Nefnir hann sem dæmi að í Svíþjóð og Þýskalandi séu sömu reglur fyrir eldri borgara og alla aðra, það er að ökumenn þurfi að endurnýja skírteini á 15 ára fresti. Í Danmörku þurfi fólk á aldrinum 75 til 79 ára að endurnýja á 5 ára fresti og 2 til 3 ára eftir áttrætt. Í Finnlandi sé krafist endurnýjunar á 5 ára fresti eftir að 75 ára aldri er náð.
„Ekki veit ég til að eldri borgarar valdi nokkrum skaða í umferðinni umfram aðra, þvert á móti,“ segir Guðjón. „Þeir hafa langa reynslu af akstri og gera sér yfirleitt grein fyrir því þegar þeir eru ekki lengur færir um hann vegna lélegrar sjónar eða annars.“
Vísar hann í tölur Samgöngustofu frá árinu 2025 þar sem komi fram að eldri borgarar, það er 67 ára eða eldri, hafi valdið 12 prósent umferðaróhappa. Það sé um það bil meðaltal af hlutfalli þeirra meðal þjóðarinnar. Ungir ökumenn, það er 17 til 26 ára, valda hins vegar 27 prósent allra óhappa í umferðinni.
„Ég krefst þess að lögum um ökuskírteini verði breytt í okkar þágu svo við þurfum ekki frekar en aðrir að standa í þeim leiðindum á hverju ári að sækja um nýtt ökuskírteini að undangenginni læknisskoðun,“ segir hann að lokum.
