Rúmlega fimm þúsund manns hafa skrifað undir undirskriftalista gegn kílómetragjaldinu. Breytingarnar tóku gildi í upphafi árs og hafa lagst misvel í landsmenn.

„Við undirrituð krefjumst þess að kílómetragjald á ökutæki verði fellt niður í heild sinni,“ segir í færslu með undirskriftalistanum á vefsvæðinu island.is.

Listinn var stofnaður í dag, 30. mars og gildir í mánuð, það er til 30. apríl næstkomandi. Viðbrögðin hafa ekki látið á sér standa og þegar þetta er skrifað hafa 5.477 manns skrifað nafn sitt á hann.

Í staðinn fyrir olíugjald

Ný lög um kílómetragjald tóku gildi um áramót. Samkvæmt þeim greiða allir eigendur ökutækja mánaðarlegt gjald óháð orkugjafa, en fyrir höfðu aðeins eigendur rafbíla greitt slíkt gjald. Í staðinn var olíugjaldið fellt niður.

„Núverandi kerfi er ekki aðeins gallað í framkvæmd, heldur einnig óréttlátt í grunnatriðum,“ segir í færslunni. „Almenningur greiðir nú þegar bifreiðagjöld og eldsneytisverð hefur hækkað á ný.“

Segja galla í kerfinu

Fullyrt er að skekkja sé á milli raunverulegs aksturs og þess sem kílómetramælir sýnir, sem geti leitt til rangrar gjaldtöku.

„Við viljum einnig leggja áherslu á að stjórnvöld geta ekki lögfest skatta á almenning í trausti þess að fyrirtæki á frjálsum markaði muni lækka verð eða hagnað, og byggja þannig tekjuöflun ríkisins á óvissu um að komið verði til móts við skattgreiðendur með lækkun vöruverðs,“ segir að lokum.

Undirskriftalistann má finna hér.