Í dag eru 98 ár síðan Slysavarnafélag Íslands var stofnað og er markmið starfseminnar enn hið sama, að koma í veg fyrir slys og bjarga mannslífum og verðmætum.

2. október 1999 sameinuðust Slysavarnafélag Íslands og Landsbjörg – landssamband björgunarsveita í ein slysavarna- og björgunarsamtök; Slysavarnafélagið Landsbjörg.

Í færslu Slysavarnafélagsins Landsbjargar kemur fram að fyrsta björgunarsveitin var stofnuð árið 1918 í Vestmannaeyjum í kjölfar tíðra sjóslysa og mannskaða við strendur Íslands. Síðan þá hafa íslenskar björgunarsveitir staðið vaktina og lagt sitt af mörkum til að tryggja öryggi almennings.

„Í dag eru starfræktar fjölmargar björgunarsveitir, slysavarnadeildir og unglingadeildir um allt land sem saman mynda þétt öryggisnet og eru ávallt reiðubúnar að bregðast við þegar á þarf að halda.

Saga félagsins er löng og viðburðarík og ljóst er að félagið væri ekki á þeim stað sem það er í dag án óeigingjarns starfs sjálfboðaliða í nærri heila öld og dyggs stuðnings landsmanna. Takk fyrir okkur og hamingjuóskir til félagsmanna!“

Hér má sjá nokkrar myndir sem félagið deilir í tilefni dagsins, fleiri myndir má sjá í færslu félagsins á Facebook.