Fjölskyldufaðir frá New Hampshire segist hafa verið ákafur stuðningsmaður Donald Trump í síðustu forsetakosningum. Eftir að hafa orðið sjálfur fyrir barðinu á hatrammri innflytjendastefnu stjórnvalda hefur sá stuðningur snúsist upp í andhverfu sína. NBC greindi frá.

Hinn 46 ára gamli Chris Landry hefur búið í New Hamsphire- fylki í Bandaríkjum frá þriggja ára aldri eftir að hafa flust þangað frá Kanada þar sem hann fæddist. Hann á eiginkonu, fimm börn og starfar í verksmiðju.

Á dögunum skellti hann sér með fjölskylduna í heimsókn til ættingja sinna til Kanada en þegar hann hugðist snúa heim var hann stöðvaður á landamærunum.

Ástæðan var sú að Landry fékk árið 2004 vægan dóm fyrir vörslu maríjúana og þremur árum síðar var hann sviptur ökuleyfi um skeið.

Síðan þá hefur Landry gengið hina beinu braut réttvísinnar og því kom honum verulega á óvart að vera yfirheyrður um þessar gömlu syndir.

Þremur klukkustundum síðar var honum tilkynnt að hann mætti ekki snúa aftur Bandaríkjanna, landvistarleyfi hans og græna kortið var dregið tilbaka.

Landry, sem gat þó ekki kosið Trump til valda því hann er kanadískur ríkisborgari, segist nú svartsýnn á að hann geti í nánustu framtíð búið með fjölskyldu sinni í Bandaríkjunum, þrátt fyrir að eiginkonan og börnin fimm séu bandarískir ríkisborgarar.

Hann segist nú freista þess að fá úrskurðinum snúið við í gegnum dómskerfið en eitt sé ljóst, hann mun ekki styðja Donald Trump áfram.