Þórhildur Magnúsdóttir, sem var elsti Íslendingurinn síðustu þrjú ár, lést 6. desember, 107 ára að aldri. Það vantaði 16 daga upp á að hún næði 108 ára aldri. Aðeins átta hafa orðið eldri en hún.

Jónas Ragnarsson greinir frá andláti Þórhildar á vefnum Langlífi, þar fylgja eftirfarandi æviágrip:

Þórhildur var fædd 22. desember 1917 í Miðhúsum í Árnessýslu, dóttir Magnúsar Gíslasonar bónda og Guðrúnar Ragnheiðar Brynjólfsdóttur húsfreyju. Systkinin voru átta. Fjölskyldan flutti til Reykjavíkur 1923. Fimm af sex dætrum Þórhildar og Gústafs Adolfs Lárussonar eru á lífi á aldrinum frá 75 ára til 83 ára. Elsta barnabarnið er orðið 67 ára. Afkomendurnir eru um eitt hundrað. Þórhildur bjó í Blesugróf í Reykjavík í rúm sjötíu ár en fór á Hrafnistu á Sléttuvegi þegar hún var 102 ára.

Þórhildur og Hulda systir hennar, sem er 99 ára, slógu í sumar Íslandsmetið í samanlögðum aldri systkina. Met þeirra er 207 ár og 108 dagar og má búast við að það standi í nokkur ár.

Þess má geta að Þórhildur var á fyrsta ári þegar Ísland varð fullvalda ríki 1918, var 12 ára þegar Alþingishátíðin var haldin á Þingvöllum 1930, var 26 ára þegar Lýðveldishátíðin var haldin á Þingvöllum 1944, var 37 ára þegar Halldór Laxness fékk bókmenntaverðlaun Nóbels 1955, var 55 ára þegar eldgosið varð í Heimaey 1973, var 62 ára þegar Vigdís Finnbogadóttir var kosin forseti Íslands 1980 og var 90 ára þegar bankahrunið varð 2008. Á ævi Þórhildar hafa tuttugu og níu forsætisráðherrar verið starfandi, níu biskupar og sjö forsetar.

Jóninna Margrét Pálsdóttir er elsti núlifandi Íslendingurinn, 105 ára, fædd í Stykkishólmi í mars 1920. Hildur Sólveig systir hennar varð 103 ára og móðir þeirra 101 árs.