Ungur íslenskur maður hefur áhyggjur af því að foreldrar hans og fleiri eldri ættingjar séu að sökkva í fen gervigreindarmyndbanda. Sum þeirra eru pólitísk og þau geri sér oft ekki grein fyrir að þetta sé ekki alvöru.
„Þannig er staðan hjá mér að nokkrir í fjölskyldunni (sérstaklega eldri ættingjar) eru stöðugt að deila alls konar AI rugli, og ég er farinn að velta fyrir mér hvort ég sé einn í þessu,“ segir hinn ungi maður í færslu á samfélagsmiðlinum Reddit. Segist hann vera að fást við eiginlegan gervigreindarfaraldur í fjölskyldunni og spyr hvort fleiri séu að fást við sama vanda.
Eins og margar fjölskyldur er hans fjölskylda með spjallhóp á Facebook Messenger. Þar setja þau meðal annars inn myndbönd.
„Í fyrstu virðast vídjóin eðlileg, en þegar betur er að gáð sést að þau eru fölsuð með gervigreind. Þetta truflaði mig ekki mikið í byrjun en mest af þessu er ekkert endilega pólítískt, en samt svo mikið kjaftæði og algjör sýra,“ segir maðurinn. „Um daginn var ég í fjölskylduteiti og kíkti í símann hjá foreldrum mínum og systkinum þeirra. Facebookið hjá nokkrum þeirra var gjörsamlega pakkað af gervigreindargubbi.“
Hjá móður hans hafi verið myndbönd um allt og ekkert en hjá föður hans mikið af pólitísku efni.
„Sem betur fer deilir hann engu, ólíkt mömmu, en hann sagði mér samt að hann sjái engan mun á gervigreindarvídjóum og raunverulegum vídjóum. Hann er mjög auðtrúa og hefur áður látið gabbast af ýmiss konar pólitísku áróðri,“ segir hann.
Staðan sé enn þá verri hjá tengdamóður hans. Sem sé komin yst á hægri vænginn. Sem og fleiri ættingjum.
„Tengdamamma er svo enn verri, þar erum við að tala um Q-nöttara sem finnst Pútín svo flottur og allt það, og svo eru aðrir ættingjar sem eru húkked á gervigreindarvídjóum. Ég skrollaði í gegnum Instagram hjá bróður pabba og þetta var 90% gervigreind, en hann sagði mér að honum finnst þessi vídjó svo sniðug og fyndin og að það truflaði hann ekkert þó þau séu feik,“ segir hann að lokum.
Hefur færslan fengið mikil viðbrögð og umræður skapast um hana. Fleiri segjast vera að lenda í þessu með fjölskyldur sínar.
„Ég hef einmitt verið að fá svona AI gubb sent frá sumum ástvinum og hef verið að útskýra þetta fyrir þeim. Ég vona að fólk hætti að nenna þessu þegar það attar sig á því,“ segir einn notandi.
„Mér finnst þetta óhugguleg þróun og þetta gerir okkur líka að andlegri amerískri nýlendu, líka í pólitíkinni,“ segir annar.
