Sigurður Helgi Pálmason, þingmaður Flokks fólksins, fjallar um frumvarp samflokksmanns síns, Eyjólfs Ármannssonar innviðaráðherra, um leigubílaakstur, í aðsendri grein á Vísir.is.

Sigurður segir að glundroði og óöryggi hafi einkennt leigubílaþjónustu frá því ný lög um starfsemina voru sett árið 2023 og nánast fullt frelsi var veitt til leigubílaaksturs. Fréttir af svindli og ofbeldi gegn farþegum hafi rýrt traust almennings á þessari mikilvægu þjónustu. Sigurður fer síðan yfir helstu breytingar sem nýtt frumvarp boðar:

„Frumvarp ráðherra sem nú liggur fyrir er ætlað að vinda ofan af þessari óheillaþróun og endurvinna öryggi og traust. Allir leigubílstjórar yrðu skyldaðir til að tilheyra viðurkenndri leigubílastöð sem beri ábyrgð á rekstri sinna ökumanna, eftirliti og því að lögum sé fylgt. Þar að auki verði innleitt rafrænt eftirlit þar sem hver einasta ferð verði skráð frá upphafi til enda ásamt verði. Þetta mun stórbæta öryggi farþega, ekki síst viðkvæmra hópa, auðvelda lögreglu rannsókn mála og draga úr líkum á ofrukkunum og svikum.“

Sigurður greinir frá því að málið sé að klárast í umhverfis- og samgöngunefnd Alþingis og gert sé ráð fyrir að það fari í aðra umræðu strax eftir áramót. Mikilvægt sé að þessar breytingar náist í gegn sem fyrst því ástandið á leigubílamarkaðnum sé óviðunandi. Sigurður segir ennfremur:

„Meginástæða frumvarps ráðherra Flokks fólksins er einföld: Öryggi og traust almennings á að vera í forgangi. Við getum ekki setið aðgerðalaus þegar óreiða ríkir á leigubílamarkaði og ógnar öryggi fólks. Með þessum breytingum tökum við skref í átt að ábyrgari, öruggari og réttlátari þjónustu, bæði fyrir farþega og leigubílstjóra.“