Skoda á heimsvísu veitti Heklu, umboðsaðila Skoda á Íslandi, alþjóðleg auglýsingaverðlaun. Í auglýsingunni er fylgst með Jómundi Ólasyni, sauðfjárbónda í Borgarfirði aka Skoda-bifreið sinni upp í eina milljón kílómetra. Saga Jómundar hefur vakið athygli um allan heim.
Tékkneski bílarisinn stendur árlega fyrir markaðsráðstefnu þar sem veitt eru auglýsingaverðlaun í fimm flokkum. Verðlaunin í ár voru haldin í Istanbul en meira en 80 innsendingar bárust frá mörkuðum Skoda um allan heim, en meðal landa sem tóku þátt voru Bretland, Frakkland, Indland og Tyrkland. Fimmtán innsendingar komust áfram í úrslit en íslenska innsendingin bar sigur úr býtum í flokknum „Styrking vörumerkis“ (e. Brand amplification). Holland var í öðru sæti með herferð sem snerist um að skapa góðar minningar með fjölskyldunni og Ítalía var í þriðja sæti með TikTok herferð sem vakti mikla athygli þar í landi.
„Sagan af Jómundi Ólasyni, bóndanum frá Íslandi sem ók Skoda Octavia bifreið sinni milljón kílómetra, er í senn heillandi og sönn en nægjusemi hans og karakter hrífa áhorfendur með og augljóslega ekki bara hér heima því sagan heillaði m.a. alþjóðlegu dómnefndina og forstjóra Skoda sem okkur þótti einstaklega skemmtilegt“, segir Berglind Sigurgeirsdóttir, markaðsstjóri Heklu.
Bíll Jómundar var af gerðinni Skoda Octavia og var upphaflega keyptur af konu Jómundar árið 2003. Í gegnum árin var bíllinn að mestu notaður í daglegum akstri frá heimili hjónanna í Mosfellsbæ og upp í Borgarfjörð þar sem Jómundur er með sauðfjárbúskap. Í seinni tíð nýtti Jómundur bílinn í alls konar sendiferðir og verkefni tengd búskapnum. Hann hefur ekið honum um malarvegi í öllum veðrum og í nokkrum tilfellum flutt rollur í bílnum.
Að sögn Jómundar er bíllinn með upprunalegan mótor, kúplingu, gírkassa og drif. Bíllinn hafi aðeins fengið eðlilegt viðhald á bremsum, dekkjum og olíu í gegnum árin.
Vörumerkjastofan Tvist vann auglýsinguna með Heklu. Framleiðsla og kvikmyndataka var á vegum framleiðslufyrirtækisins Sensor og Erlendur Sveinsson leikstýrði.
