Héraðssaksóknari hefur ákært mann á þrítugsaldri fyrir sérstaklega hættulega líkamsárás. Manninum er gefið að sök að hafa veist að manni í íbúð í Yrsufelli í Reykjavík og slegið hann í höfuðið með mótorhjólakeðju. Hlaut brotaþoli, sem er um fertugt, 5 cm langan skurð á hvirfli og vægan heilahristing, auk þess mar, bólgu og rispu á hægri handlegg.
Atvikið átti sér stað 11. febrúar árið 2024.
Málið verður þingfest fyrir Héraðsdómi Reykjavíkur þann 14. nóvember næstkomandi.
