Nýr stafrænn skanni í 8K gæðum frá tæknifyrirtækninu HP, verður frumsýndur á OK ráðstefnunni á Hotel Hilton Nordica í dag. Græjan ber heitið HP Z Captis og getur umbreytt efni í stafrænt form fyrir 3D-hönnunarferli, eins og segir í tilkynningu. 

Þessi byltingakennda lausn vann til verðlauna á CES tæknimessunni í Las Vegas á þessu ári. Lausnin virkar hnökralaust með Adobe Substance 3D Sampler og gerir notendum kleift að taka sýnishorn beint úr raunveruleikanum og umbreyta því í stafrænt efni. 

„Með því að færa efni í stafrænt form eykst skilvirkni á öllum stigum frá hönnun til framleiðslu og markaðssetningar. Með HP Z Captis er hægt að spara tíma, minnka kostnað og draga verulega úr efnisúrgangi. Þannig má segja að HP Z Captis sé brú milli hins áþreifanlega og hins stafræna heims, tæki sem gerir skapandi teymum kleift að fanga raunveruleikann og nota hann beint í hönnunar- og þróunarvinnu,“ segir Ísold Einarsdóttir, markaðsstjóri OK.

Lausnin hentar meðal annars fyrir arkitektúr og byggingahönnun, bíla- og iðnhönnun, tísku- og vefiðnað, leikjaiðnað og kvikmyndagerð, húsgagnagerð og iðnhönnun eða rannsóknir og nýsköpun af ýmsu tagi.

HP Z Captis var valin Best of Innovation á CES 2025 í Las Vegas fyrir framúrskarandi hönnun og tæknilega nýbreytni í aukabúnaði.