Eldar loga einnig á fleiri svæðum og eru þekktir leikarar í hópi þeirra sem misst hafa heimili sín.
Billy Crystal, sem orðinn er 76 ára, missti heimili sitt til 46 ára í eldsvoðunum en hann og eiginkona hans, Janice, höfðu búið í húsinu frá árinu 1979. „Við ólum börnin okkar upp í þessu húsi og barnabörnin. Hver einasti fermetri í húsinu var uppfullur af ást og það geymdi minningar sem verða ekki teknar í burtu,“ sagði hann.
Paris Hilton kveðst hafa horft á heimili sitt í Malibu brenna til kaldra kola í beinni útsendingu í sjónvarpinu. Það sé eitthvað sem enginn eigi að þurfa að upplifa. „Við áttum margar góðar minningar úr þessu húsi og það var þar sem Phoenix tók sín fyrstu skref,“ sagði hótelerfinginn og raunveruleikastjarnan fyrrverandi.
Leik- og söngkonan Mandy Moore segir að skóli barnanna hennar hafi brunnið til kaldra kola og margir af hennar uppáhaldsveitingastöðum. Þá hafi margir vina hennar misst heimili sín.
Leikarinn James Woods brotnaði saman þegar hann ræddi við CNN um þá staðreynd að hann væri búinn að heimili sitt. „Þetta er eins og að missa ástvin. Það reynir verulega á sálina að missa allt sitt í einu,“ segir hann.
Fleiri þekktir einstaklingar eru sagðir hafa misst heimili sín í eldsvoðunum, þar á meðal Eugene Levy og John Goodman.
