Móðir á Norðurlandi hefur verið ákærð fyrir að láta umskera son sinn. Drengurinn var í lífshættu eftir aðgerðina og þurfti að fara með hann á sjúkrahús í skurðaðgerð.
Héraðssaksóknari hefur ákært móðurina fyrir sérstaklega hættulega líkamsárás, brot í nánu sambandi og brot gegn barnaverndarlögum. Verður sakamálið höfðað fyrir Héraðsdómi Norðurlands eystra þann 27. janúar næstkomandi.
Móðirin er sökuð um að hafa fengið óþekkta konu til að skera forhúðina af getnaðarlimi ólögráða sonar hennar. Þessi ólöglega aðgerð fór fram á heimili þeirra þriðjudaginn 27. september árið 2022.
Í ákærunni, sem var gefin út 12. september á síðasta ári, koma nöfnin ekki fram og heldur ekki aldur eða þjóðerni fólksins.
Aðgerðin gekk illa og þurfti að fara með drenginn á Sjúkrahúsið á Akureyri í kjölfarið. Það er sama dag og hún var gerð. Þar þurfti drengurinn að gangast undir svæfingu og skurðaðgerð. Einnig að dvelja á spítalanum í tvo daga eftir aðgerðina.
Í ákærunni segir að móðirin hafi með þessari háttsemi ógnað lífi og velferð sonar síns á sérstaklega sársaukafullan og meiðandi hátt. Er þess krafist að hún verði dæmd til refsingar og greiðslu alls sakarkostnaðar.
Í málinu er einnig gerð einkaréttarkrafa fyrir hönd hins ólögráða sonar. Það er að móðirin greiði honum miskabætur að fjárhæð 4 milljónir króna auk vaxta. Einnig er þess krafist að hún greiði þann málskostnað sem hlýst af málinu.
