Þýski níðingurinn Christian Brueckner, sem er efstur á lista grunaðra varðandi hvarf Madeleine McCann í Praia da Luz, Portúgal árið 2007, losnar úr fangelsi í vikunni. Þá hefur hann lokið afplánun sjö ára fangelsisdóms sem hann fékk fyrir að nauðga og ráðast á eldri konu í Portúgal, tveimur árum áður en Madeleine hvarf.

Breskir miðlar greina frá því að Brueckner hafi hafnað boði breskra lögregluyfirvalda um að hann gefi skýrslu varðandi málið en að svo stöddu er ekki hægt að þvinga hann til skýrslugjafar.

Brueckner, sem er margdæmdur níðungur, hélt árum saman til á þvi svæði sem Madeleine hvarf. Nokkrar umfangsmiklar leitir hafa verið skipulagðar undanfarin ár eftir rannsóknarvinnu lögreglu, sú síðasta fór fram í grennd við bæinn Lagos í júní í sumar.

Brueckner hefur alfarið neitað því að tengjast hvarfi Madeleine á nokkurn hátt, Hins vegar segja breskir miðlar að það að hann geti brátt um frjálst höfuð strokið sé mikið áfall fyrir foreldra Madeleine sem rétt eins og lögreglan gruna Þjóðverjann ógeðfellda um græsku.