Ísraelsher hefur lýst ábyrgð á sprengjuárás sem gerð var í Doho, höfuðborg Katar, í dag. Skotmarkið voru leiðtogar Hamas-samtakanna sem búsettir eru í borginni, að því er fram kemur í frétt breska ríkisútvarpsins.

Yfirvöld í Katar hafa fordæmt árásina harðlega og segir Dr. Majed Al Ansari, talsmaður utanríkisráðuneytis landsins, að árásin sé gróft brot á alþjóðalögum og alvarleg ógn við þá sem dvelja í Katar.

Hann segir að árásin hafi beinst að íbúðarhúsnæði í Katar þar sem nokkrir meðlimir á stjórnmálaskrifstofu Hamas dvelja. Hafa Hamas-samtökin sagt að árásin hafi beinst gegn fulltrúum samtakanna sem unnið hafa að því að ná vopnahléi.

Yfirvöld í Íran hafa einnig fordæmt árásina og segir Esmail Baghaei, talsmaður utanríkisráðuneytisins, að um skýrt brot á alþjóðalögum sé að ræða.

Á samfélagsmiðlum má sjá myndir af þykkum reyk yfir borginni. Ekki liggur fyrir á þessari stundu hvort mannfall hafi orðið.

Israel bombs Doha – How many countries Israel is going to attack in the name of so-called self defense! pic.twitter.com/YSgwqSmQa0

— Ashok Swain (@ashoswai) September 9, 2025