Lögreglan á höfuðborgarsvæðinu tekur nú hart á þeim sem hafa án heimildar sett upp skyggðar filmur í bifreiðar sínar en þrír voru sektaðir í dag fyrir slíka notkun. Þetta kemur fram í dagbók lögreglu.
Kona var handtekin í hverfi 108 grunuð um ölvunarakstur en látin laus að lokinni sýnatöku á lögreglustöð. Hundur beit barn í Hlíðunum og hlaut barnið smávæglega áverka en lögreglu tókst hvorki að hafa uppi á hundinum né eiganda hans.
Fleiri fengu sektir fyrir umferðarlagabrot, einn fyrir óheimila notkun farsíða, annar fyrir að aka án skráningarmerkis. Tveir fengu sekt fyrir hraðakstur, annar þeirra fyrir að aka á 86 km/klst þar sem hámarkshraði var 50 km/klst og hinn fyrir að aka hópferðarbifreið í Breiðholti á 61 km/klst þar sem hámarkshraði er 30 km/klst.
Tilkynnt var um ungmenni með hníf á leiksvæði í Hafnarfirði, en ekki voru gefnar frekari upplýsingar um málið.
Maður var kærður fyrir þjófnað í verslun í Kópavogi og tilkynnt var um innbrot og þjófnað í heimahús í Árbæ.
