Brynjar Joensen Creed, maður á sextugsaldri, var þann 12. maí, sakfelldur í Héraðsdómi Reykjaness fyrir kynferðisbrot gegn 15 stúlkum undir lögaldri.

Brotin varða kynferðislega áreitni gegn barni og brot vegna barnaverndarlögum en um var að ræða rafræna áreitni þar sem Brynjar viðhafði kynferðislegt tal við börnin, sendi þeim klámfengnar myndir og reyndi að fá þau til að senda sér kynferðislegar myndir af sjálfum sér. Fóru þessi samskipti fram í gegnum samfélagsmiðilinn Snapchat.

Brotin voru framin á árunum 2020 til 2021.

Brynjar afplánar nú sjö ára fangelsisdóm fyrir brot sem sum hver eru enn alvarlegri og varða nauðgun í einhverjum tilvikum. Rannsókn á brotum hans hefur verið gífurlega umfangsmikil en skipta brotin tugum.

Brynjar bar við í málsvörn sinni að hann hafi ekki hugsað út í aldur viðmælenda sinna og ekki vitað hvað stúlkurnar væru gamlar. En ýmislegt í gögnum málsins gefur vísbendingu um að honum hafi mátt vera fullljós ungur aldur viðmælenda sinna. Meðal annars kemur þetta fram:

„Í málinu liggja fyrir hljóðskilaboð, líkt og áður greinir. Við hlustun þeirra er fullljóst, að mati dómsins, að ætla má að sú sem þar talar sé barnung að aldri auk þess
sem orðfæri brotaþola var með slíkum hætti. Af fyrirliggjandi gögnum verður ráðið að ákærði hafi viðhaft kynferðislegt tal við C á tilgreindu tímabili og sent henni kynferðislegar myndir af berum kynfærum karlmanns, líkt og greinir í ákærukaflanum.“

Brynjar var dæmdur í þriggja ára fangelsi fyrir þessi brot. Hann var auk þess dæmdur til að greiða samtals um 15 milljónir króna í miskabætur til 15 brotaþola. Auk þess þarf hann að greiða nokkuð yfir eina milljón í málskostnað.

Dóminn má lesa hér.