Í dag var þingfest í Héraðsdómi Vesturlands í Borgarnesi mál sem héraðssaksóknari hefur höfðað gegn manni sem sakaður er um nauðgun, kynferðisbrot gegn barni og brot á barnaverndar- og áfengislögum.
Maðurinn er í ákærunni sagður hafa aðfaranótt laugardagsins 29. júlí 2023 mælt sér mót við 13 ára stúlku og sótt hana á bíl. Ók hann með hana á afvikinn stað, rétt fyrir utan bæinn (væntanlega Borgarnes eða Akranes, nöfn og staðarnöfn eru hreinsuð úr ákærunni), „þar sem hann með ólögmætri nauðung í krafti yfirburðarstöðu sinnar vegna aldurs- og þroskamunar“ og þar sem stúlkan var ein með honum, fjarri öðrum, og með því að lofa henni áfengi, lét hana hafa munnmök við sig í aftursæti bílsins, þar til hann fékk sáðlát.
Daginn eftir afhenti maðurinn stúlkunni sex flöskur af Breezer-ávaxtavíni sem greiðslu fyrir munnmökin.
Í öðrum ákærulið er maðuinn sakaður um tilraun „til nauðgunar og kynferðisbrots gegn barni, en til vara nettælingu, með því að hafa aðfaranótt sunnudagsins 30. júlí 2023, sett sig í samband við xxxx í gegnum samskiptaforritið Snapchat, með það fyrir augum að hafa við hana önnur kynferðismök en samræði, með því að bjóða henni áfengi og peningagreiðslu gegn því að hún hefði við hann munnmök.“
Héraðssaksóknari krefst þess að maðurinn verði dæmdur til refsingar og greiðslu alls sakarkostnaðar.
Fyrir hönd stúlkunnar sem hann braut gegn samkvæmt fyrri ákærulið er krafist miskabóta upp á fimm milljónir króna.
