Í rúmlega 200 ár hefur Sviss verið hlutlaust ríki og hefur verið vísað í stjórnarskrárbundið hlutleysi landsins til að halda þjóðinni og vopnum, framleiddum þar, frá átakasvæðum, það gildir einnig um stríðið í Úkraínu því Svisslendingar hafa ekki leyft sölu á svissnesk framleiddum vopnum þangað.
Þetta hefur vakið mikla reiði margra NATÓ-ríkja og mikill efnahagslegur og öryggispólitískur þrýstingur er nú á Svisslendinga að hverfa frá þessari hlutleysisstefnu sinni. Þetta kemur fram í nýrri skýrslu frá nefnd, sem var skipuð af ríkisstjórn landsins.
Nefndin mælir með því að Svisslendingar auki hernaðarsamstarf sitt við NATÓ og ESB og íhugi hvort falla eigi frá ákvæðum um að landið sé ekki meðlimur í slíkum bandalögum. Hvetur nefndin til sveigjanlegri nálgun hvað varðar hlutleysisstefnu landsins.
Í nefndinni sitja háttsettir embættismenn, hermenn og diplómatar. Nefndin mælir ekki með því að fallið verði beint frá hlutleysisstefnunni en mælir með að unnið verði að „sameiginlegri varnargetu“ með ESB og NATÓ, þar á meðal sameiginlegum heræfingum og loftvörnum.
Nefndin segir einnig að nauðsynlegt sé að afnema blátt bann við því að svissnesk vopn séu flutt eða gefin til landa sem eiga í stríði.
