Kirov-héraðið er um 1.200 km frá úkraínsku landamærunum. En það dugir ekki til að héraðið sleppi alveg við áhrif stríðsins í Úkraínu. Að minnsta kosti ekki lengur. Aðfaranótt þriðjudags í síðustu viku gerðu Úkraínumenn fyrstu árás sína í héraðinu. Skotmarkið var olíubirgðastöð.
Sömu nótt réðust þeir einnig á olíubirgðastöð í Rostov. Myndir frá báðum stöðum sýndu mikinn svartan reyk leggja frá þeim. Með þessum árásum voru árásir Úkraínumanna á rússneskar eldsneytisbirgðastöðvar og orkuinnviði orðnar 64 á þessu ári samkvæmt samantekt BBC.
Over two days after a successful Ukrainian drone strike, the Russian Rosreserv Atlas fuel depot continues to burn in Rostov Oblast.
At least six fuel storage tanks at the facility have been destroyed, while hundreds of Russian firefighters attempt to put out the blaze. pic.twitter.com/nQcTQqmBCh
— OSINTtechnical (@Osinttechnical) August 30, 2024
„Maður kallar þetta auðveld og góð skotmörk. Svona eldsneytisbirgðastöðvar eru mjög viðkvæmar. Það þarf ekki mikið til að eldur komi upp og þegar það gerist, þá er mjög erfitt að slökkva hann aftur. Með frekar litlum aðgerðum er hægt að ná miklum áhrifum,“ sagði Alexander With, hernaðarsérfræðingur við danska varnarmálaskólann, í samtali við Jótlandspóstinn um ástæðu þess að Úkraínumenn ráðast hvað eftir annað á eldsneytisbirgðastöðvar og orkuinnviði.
Áhrifamesta árás þeirra til þessa var á eldsneytisbirgðastöð í eigu ríkisins í Proletarsk. Árásin var gerð 18. ágúst og logaði enn í henni í síðustu viku. Þá höfðu 40 slökkviliðsmenn slasast í baráttunni við eldhafið.
En af hverju geta Rússar ekki bægt þessum árásum frá? „Það er af því að Rússland er stærsta land heims,“ sagði With og átti þar við að Rússar neyðast til að forgangsraða loftvörnum sínum og hafa þær við staði sem þeir telja mikilvægasta.
Eftir því sem Úkraínumenn hafa þróað sín eigin vopn og lagt áherslu á árásir á rússneska orkuinnviði, þá hefur orðið erfiðara fyrir Rússa að verjast.
