Alvarlegt umferðarslys varð rétt eftir miðnætti í nótt við Sæbraut hjá Vogabyggð, er ekið var á gangandi vegfaranda. Í dagbók lögreglu kemur fram að ökumenn hafi sýnt lögreglu lítinn skilning við störf hennar á vettvangi. „Meðan lögreglumenn voru við störf á vettvangi bar að nokkurn fjölda vegfaranda og er það samdóma álit lögreglumanna að hluti vegfaranda hafi sýnt störfum lögreglu lítinn skilning og verið ósáttir við að komast ekki leiðar sinnar. Lögregla minnir á að ávallt er góð ástæða fyrir lokunum lögreglu, en þær eru bæði til að tryggja vettvanginn í tenglsum við rannsóknarhagsmuni auk þess að tryggja öryggi viðbragðsaðila sem starfa innan lokana,“ segir í dagbók lögreglu um atvikið.

Mikill erill var hjá lögreglu í nótt og var töluvert um ofbeldisbrot og ógnanir. Meðal annars var tilkynnt um líkamsárás í heimahúsi í umdæmi lögreglustöðvar 3 og var einn handtekinn.

Maður kom á Bráðamóttöku og tilkynnti að hann hefði verið stunginn í brjóstkassann. Málið er í rannsókn.

Þá voru tveir menn handteknir á skemmtistöðum í miðbænum eftir að dyraverðir höfðu óskað aðstoðar lögreglu vegna þeirra. Annar maðurinn var settur í handjárn en dyraverðir voru með hann í tökum þegar lögregla kom.

Maður var handtekinn í miðbænum en hann hafði í hótunum við fólk með því að ógna því með eggvopni.

Tilkynnt var um umferðaróhapp og að tjónvaldur hafi ekið af vettvangi án þess að gera viðeigandi ráðstafanir. Tjónvaldur fannst skömmu síðar og í kjölfarið var tekin skýrsla af honum vegna málsins.

Tilkynnt var um grunsamlegar mannaferðir við skóla þar sem einstaklingur með vasaljós gekk um. Þegar lögregla kom á vettvang reyndist hinn grunsamlegi vera starfsmaður öryggisfyrirtækis að sinna eftirliti.

Ennfremur var maður handtekinn grunaður um líkamsárás á skemmtistað. Var hann vistaður í fangageymslu í þágu rannsóknar málsins.