Atvinnulaus, 28 ára gömul kona, Danielle Kelly, hefur verið fundin sek um fjársvik í sérstæðu máli.
Danielle, sem býr í Stoke á Englandi, setti upp söfnunarsíðu á vefnum Go-fund-me þar sem hún safnaði fé fyrir útför móður sinnar. Henni tókst að safna tæplega 3.500 pundum, sem er andvirði vel yfir 600 þúsund íslenskra króna.
Danielle sótti síðan um aðstoð hjá bæjaryfirvöldum í Stoke til að fjármagna jarðarförina en greiddi ekki sjálf til útfararstofunnar.
Þegar yfirvöld komust á snoðir um söfnunina var Danielle síðan ákærð fyrir fjársvik. Danielle viðurkenndi að hún hefði ekki notað söfnunarféð í útfararkostnað en sagðist hafa verið nauðbeygð til að verja peningunum í húsaleigu og matarkaup.
Hún var dæmd í 20 vikna fangelsi en dómurinn er skilorðsbundinn. Hún þarf hins vegar að gangast undir 15 daga endurhæfingu og vinna ólaunaða þegnskylduvinnu í 140 klukkustundir.
Metro og fleiri miðlar greindu frá.
