Rússar hafa hert flugskeyta- og drónaárásir sínar á Úkraínu á síðustu vikum og geta nú bætt enn frekar í eftir að íranska klerkastjórnin sendi þeim 200 flugskeyti.
The Times segir að rússneskt skip hafi flutt flugskeytin til Íran og hafi þeim verið skipað í land á miðvikudag í síðustu viku.
Wall Street Journal hefur eftir heimildarmönnum innan leyniþjónustustofnana í Bandaríkjunum og Evrópu að flugskeyti hafi verið flutt frá Íran til Rússlands.
NATÓ og G7-ríkin vöruðu Írani við því í sumar að senda Rússum flugskeyti eða láta þeim tækniþekkingu í té, því það myndi bæta enn í stríðið í Úkraínu og vera bein ógn við öryggi Evrópu.
Sendifulltrúar Írans hjá Sameinuðu þjóðunum í New York vísuðu því á bug á föstudaginn að flugskeytin hefðu verið send til Rússlands en sólarhring síðar staðfesti íranskur þingmaður að það hefði verið gert.
Úkraínska leyniþjónustan segir að um Fath-360 flugskeyti sé að ræða en þau draga um 120 km og geta því hæft skotmörk við víglínuna en einnig dregið allt að borgum eins og Kharkiv og Sumy.
Með því að nota írönsku flugskeytin geta Rússar notað sín eigin langdrægu flugskeyti til að gera árásir enn lengra inn í Úkraínu.
Úkraínumenn óttast að þessi sendingin geti verið fyrirboði þess að Íranar sendi Rússum flugskeyti sem draga rúmlega 500 km.
